政壇：怪醫獻計操弗港青
兒童肥胖、青年隱蔽，本港青少年問題多多，好多人都為呢啲現象把脈，批評本地教育出咗問題，不過，主管教育嘅教育局局長吳克儉就冇乜好橋，反而，有怪醫之稱嘅立法會醫學界議員梁家騮就有計，佢建議所有學校提高體育科所佔嘅學分，甚至將體能列入考大學嘅其中一項條件，咁樣一定可以鼓勵學生哥多啲運動同接受體能訓練喇。吳得掂一聽呢條橋，就稱讚有助五育，只係可唔可以落實，睇怕要社會好好討論。
設計圖片及對白
學生係香港嘅未來，但港生近年嘅國際評估表現就麻麻，除咗數學科表現出眾啲，其他如語文、體藝都輸人幾條街，立法會體育、演藝、文化及出版界議員馬逢國就好關注兒童肥胖，尋日喺大會上提出口頭質詢，詢問吳得掂個局有否檢討中小學體育課程、增加體育課時數？同埋點樣培養學生做運動嘅習慣？吳得掂嘅回應好行貨，講嚟講去，都走唔出學校體育堂嘅範圍。
吳得掂讚有助五育
輪到怪醫發言時，佢話自己讀中學時，體育科佔五十分，數學科就佔二百分，學生好自然咁放多啲時間落數學科。所以佢建議當局要求學校提高體育科佔嘅分數，例如提升到一百分，甚至提議學生要符合最低體能要求先可以入大學，希望可以令家長同學生花多啲時間喺體育科上喎。
佢呢個建議等於將體能列入大學收生條件之一，對追求學位為本嘅家長同學生嚟講，可算一擊即中。
吳得掂都似乎幾贊成呢個提議，話依家除咗面試，學校仲會考慮學生喺其他活動嘅表現，如果將體能列為入大學條件之一，相信可以提高學生嘅競爭力，仲可以實踐「德、智、體、群、美」五育理念添！
不過，睇番依家活躍於大學嘅學生，尤其係近年冒起嘅學運代表，唔係弱質纖纖就係精神委靡咁款，體育、運動好似唔太在行噃，睇怕將來嘅大學生都要加強呢方面嘅訓練，不過，如果將來再發生佔領行動，係好事定壞事呢？
