張炳良諷前處長論三跑過時
【本報訊】兩名前民航處處長樂鞏南及林光宇一直質疑三跑效益，擔心跑道淪為大白象工程。運輸及房屋局局長張炳良昨出席電台節目時指三跑「一定要起」，才能保持本港國際航空樞紐地位，更隔空向樂、林兩人「挑機」，質疑兩人不在其位多年，不知粵港協議內容。
張炳良
樂鞏南擔心三跑只是紙上談兵。（資料圖片）
林光宇不滿張炳良指已與內地解決空域擠塞，要求公開文件作證。
林光宇：有膽攞文件出嚟
樂鞏南及林光宇曾質疑未來三跑航道與內地空域重疊，若內地對開放空域寸步不讓，新跑道容量增幅將大打折扣。張炳良昨表示，早於○七年已完成與內地商討解決空域擠塞問題，「佢有好詳細嘅嘢，我自己睇過，佢都有好幾十頁，係一個協議嚟，當然佢唔係一個條約咁嘅東西，但大家同意咗啦，要做呢啲嘢嘞，係為咗大家嘅好處」。
張炳良暗諷兩人「過時」，「兩位處長在任時，坦白講已經好多年啦，○四年後我哋（本港與內地）好多商討、好多細節，佢哋離任咁耐未必明白。」
林光宇在電台節目中指，「政府有膽就攞（協議文件）出嚟，睇吓二○○七年做咗乜嘢？同項目有關嘅『打手』話我吃裏扒外，甚麼叫吃裏扒外？我有責任講番睇法，樂處長我估計亦一樣，因為我哋都係公認嘅空管專家！」樂鞏南回應本報查詢時指，「咁佢（張炳良）無講錯，我哋係無同民航總局傾過……但問題我哋依家係恐懼，條跑道係咪只係紙上談兵？」他指無實質證據支持三跑能增加航機升降量，港府應進行實時模擬運作測試，證實三跑作用才落實興建。
