廉航未必質劣 監管不能卸膊

唔係講笑o架，如果閣下幫襯廉價航空公司，分分鐘成為上述悲劇嘅主角。消委會公布針對廉航嘅投訴數字，舊年全年達七百六十多宗，平均每日兩宗，比前年勁升一倍，更加比一二年翻咗十番，都咪話唔誇張。投訴最多嘅係機上收費爭拗，例如長途機程中索取枕頭要額外收費，其次係航班延誤或取消。有旅客試過網上訂購廉航機票來回馬來西亞，點知回程時至知航班取消咗，焗住要住多晚酒店搭第二朝機。

最離譜嘅係，旅客返港後向航空公司投訴，點知對方推三推四，藉口多多，一時話已經電郵確認，一時又話打過電話通知，總之千錯萬錯都係個客錯，你話唔慶就假。

可能有人會話，一分錢、一分貨，畀三星級價錢，想享受五星級服務，好似唔係咁啱數喎。嗱，呢啲嘢兩睇嘅啫。廉航做到個價咁低，「增值服務」另外收費係可以理解嘅，但咁唔代表可以亂咁取消航班o架嘛。不妨打個譬喻，有乘客搭巴士投訴班次唔準，巴士公司可唔可以答「想即刻有車點解唔搭的士」吖？

其實，廉航絕對唔係服務差劣嘅代名詞。就講安全問題吖，有航空專家計過數，由○三至一三呢十年裏面，傳統航空公司共發生八百幾次嚴重事故，一百六十架飛機墜毀，反觀廉航只分別有一百一十幾次事故同十四架飛機墜毀。既然廉航喺安全方面唔比傳統航空公司輸蝕，點解服務質素唔可以大大改善？如果廉航唔自律，點解港府唔監管？

不過嘥氣啦，家陣本港對廉航嘅監管可以話係一片空白，民航處官僚亂揈公帑起豪華娛樂城、羅馬大浴池就話叻啫，監管航空公司服務唔係佢哋嗰瓣；機管局話就話要求航空公司確保航班準時，但原來根本冇就違規訂立罰則，擺到明係無牙老虎。曾經有立法會議員建議，將航空公司納入旅遊業議會規管，可惜吖，講者自講，業界反應冷淡，到依家都仲未有下文。

點講都好喇，廉價航空已經係大勢所趨，未來會有愈來愈多廉航搶攻香港市場，邊個負責監管，唔該港產官僚自己拆掂佢，唔好忘記，你哋收得五星級薪水，絕對唔可以提供三星級服務o架，叮！