城中鏡：馬雲晒冷騷網購靠個樣
呢幾日全球IT界都(目及)實喺德國舉行嘅漢諾威CeBIT（資訊及通訊科技博覽會），阿里巴巴話事人馬雲點會放過任何晒冷機會？佢今次喺CeBIT展開幕式上，當住國務院副總理馬凱同德國總理默克爾面前，用自己個Face晒冷。估唔到哩！
馬雲即場用自己個Face做密碼，喺淘寶淘咗個漢諾威紀念郵票。（互聯網圖片）
佢前日就喺CeBIT展開幕式上，即席示範阿里旗下螞蟻金服嘅全新Smile to Pay掃臉付款技術，取代傳統密碼作為購物後嘅支付認證，仲即場用嚟喺淘寶淘咗個一九四八年漢諾威紀念郵票，真正用塊面嚟畀錢。
呢個技術係由螞蟻金服同Face++一齊開發，識別率聽講高達百分之九十九點五。呢家Face++喺二○一二年先成立，用戶除咗阿里外，仲有360、微博、陌陌等。
馬雲今次用自己個樣做示範，擺明有優勢。佢自己都講過「我很普通，只是長得像外星人」，一副不凡ET相，辨識度自然高。螞蟻金服呢項指吓塊面嚟畀錢嘅技術，目前雖然仍未正式投入商用，但睇嚟好快嘞！
