市面愈出愈多智能乜乜乜，多個運動品牌都同啲Tech公司Crossover。內地運動品牌李寧尋日就喺官方微博宣布，同小米手環嘅母公司華米合作推出新一代智能跑鞋。

李寧推出新一代智能跑鞋，可以教埋你點跑。（資料圖片）

呢款智能鞋含有智能晶片，仲可以同小米運動移動端App相連，記錄穿着者嘅運動過程同數據，教埋你點跑，會喺今年第三季出。聽落好high-tech咁，幾錢先？李寧嘅負責人話，價格會走親民路線，希望所有中國人都可以輕鬆買得起咁話。

其實智能鞋已唔算係最新嘅嘢。早兩個月，另一個內地運動品牌361度就孖住百度出咗「智能童鞋」，特點係除咗可以監測小朋友身體狀況外，仲係有防拐功能，啲鞋有定位技術，配合百度地圖LBS平台，可以定位追蹤住啲小朋友，一離開監控範圍就會通知父母。唔知有冇考慮出情侶款呢？

第一手消息請下載on.cc東網iPhone/iPad/Android/Windows Phone Apps