城中鏡：AO歌王開個唱行善
素有「AO（政務官）歌王」美譽嘅民政事務局前常秘Raymond楊立門，當年同梅艷芳喺新秀歌唱比賽中雙雙進入決賽，佢自退休後終有機會追逐夢想。尋晚佢以「健康快車光明大使」身份，喺香港大會堂演奏廳舉行首個個人慈善演唱會，吸引大批前AO同事及政商界名人捧場。一嘗開個唱滋味嘅佢，全晚施展渾身解數，唱勻中、英以至日文歌曲，包括「You Light Up My Life」、「Beatles Medley」、「讓一切隨風」等，台風十足。期間佢仲落台遞咪畀其中一位「粉絲」商務及經濟發展局前局長馬時亨一齊唱，氣氛高漲。
楊立門演出令個唱現場氣氛高漲。
Raymond走進觀眾席，下手兼粉絲馮程淑儀（箭嘴示）表現瘋狂！
左起高永文、李麗娟、演藝校董會前主席梁乃江都有嚟捧場。
馬時亨同太太一齊入場支持Raymond，仲獲對方邀請一同獻唱。
個唱梗唔少得話當年嘅環節，Raymond大爆當時新秀大賽時，因不滿被迫要着古裝，搞到成個「秋官」咁出場而中途退出。佢又話至今冇後悔過加入政府，起碼任內冇被人叫落台或辭職。但佢有時都不禁會諗，若果佢留喺樂壇發展，啲金曲就唔會畀咗其他「天王級」歌星唱喎。佢仲透露，本來做好最壞打算，萬一個唱冇人嚟，就孭起晒所有演唱會門票，笑言預咗唔見一大截退休金。
千四座位全爆滿
結果演奏廳全場一千四百個座位座無虛席，Raymond嘅上上手民政局前常秘「媽打」李麗娟同下手現任常秘Betty馮程淑儀都有嚟捧場，Betty更全程揮動吹氣棒，近似瘋狂地熱烈歡呼同打氣。Raymond又罕有公開獻唱「你的名字我的姓氏」，冧爆喺現場嘅太太。連佢個仔楊上知都自愧不如，話爸爸平日在家甚少唱歌，呢晚嘅表現真係要畀足一百零一分。
今次演唱會籌備咗近九個月，約籌得一百四十萬港元。嚟到捧場嘅仲有食物及衞生局局長高永文、教育局前局長「孫公」孫明揚夫婦、新聞處處長聶德權、九巴後人雷兆光同太太雷林靜怡、「玩具大王」蔡志明太太蔡李惠莉、媽打細妹李桂蘭等等，多到數唔晒。
