泛民主派早前發起不合作運動喺立法會多個委員會拉布，例如工黨李卓人、社民連梁國雄同人民力量陳志全等人通通有份，尋日財委會特別會議討論部分直接納入預算案一併審議嘅項目，李卓人話自己喺預算案發表後見到另外二十一項撥款申請，政府決定納入預算案，唔經財委會會議，佢批評政府自一九八五年後，都未試過將非經常開支納入預算案審議，質疑政府破壞三十年來既憲制慣例，旨在繞過或避開立法會監察。

設計圖片及對白

建制派聽到泛民惡人先告狀，隨即群起反駁泛民歪理，「賊喊捉賊」，其中工聯會嘅議員KK黃國健火力最猛，狠批泛民拉布已成常態，形容拉布阻礙條路同行車線，駕駛者當然諗辦法轉線，唔通塞住喺度唔郁同等咩？佢又諷刺泛民喺立會「唔拉布就唔舒服」，自言拉布同泛民已成等號，依家「塞車唔畀轉線都要鬧」，認為係有人太霸道︰「你破壞在先，人家採取應對方式你都唔畀，仲大興問罪之師，我覺得太霸道。」

工聯會另一議員陳婉嫻承認政府做法少見，形容此舉係「非常手法」，好似迪士尼樂園工程、電影發展基金都要討論，冇得監察係唔得。嫻姐又話，自己做咗二十年議員，唔同意政府呢個做法，不過都知政府形勢困難。

財經事務及庫務局局長陳家強回應話，政府檢視後認為部分非經常開支，好似更新設備，爭議唔大，唔涉及新政策，認為應該同經常開支做法睇齊，無意繞過立法會。佢承認今次係三十年來首次將非經常開支納入預算案，係為咗精簡程序，應對立法會財委會緊迫嘅審議時間表，至於首長級公務員開位，以及工務工程都會繼續由財委會審議。究竟係邊個惡人先告狀，邊個破壞憲制傳統迫令政府變招出擊，答案相信不言而喻嘞！

第一手消息請下載on.cc東網iPhone/iPad/Android/Windows Phone Apps