政壇：廠商會度橋搞大工展

香港中華廠商聯合會每年一度喺維園搞工展會，據聞廠商會有意擴大展區，除咗計劃年底喺葵涌區搞一個規模較細啲嘅工展會外，副會長戴澤良透露初步有兩大想法：第一係租用中央圖書館嘅展覽室或會議室，主要係畀後生仔或社企擺檔，第二係於維園嘅有限空間內加設幾個檔位。

戴澤良（左起）、陳淑玲、李秀恒同吳永嘉齊齊度橋擴大工展會展區。

戴澤良話基於中央圖書館相關展覽室或會議室今年已全數租出，可能要明年先有機會做到，至於維園內再加設檔位亦要注意消防等安全問題。對於廠商會近年租用維園作工展會場地，康文署多次傳出有意加租，佢話唔擔心康文署再出招趕佢哋走，因市民習慣咗去維園工展會。

另外，廠商會會長李秀恒提出喺長沙灣發展時裝飾物批發中心，紅磡發展珠寶皮革批發中心，但佢強調有關構思唔係針對水貨客問題，旨在加強香港嘅商業模式，正與政府多個部門商討建議。