政壇：謝偉俊倡服兵役換居所
近年中央及特區政府三令五申，話要加強香港青年人對祖國嘅認識及身份認同，有人建議強制香港學生同教師必須北上考察受訓，亦有人提出畀香港青少年接受正統嘅解放軍軍訓，甚至正式服埋兵役。獨立建制派議員Paul謝偉俊尋日出席一個電台節目時，就更加大膽提議「兵役換宿舍」計劃，即港青只要當夠三年兵，就可以喺駐港解放軍旗下嘅宿舍住足十年，一次過解決晒港青嘅身份認同及住宿需求問題，認真有創意。
阿Paul倡港青只要當兵三年，就可喺駐港解放軍宿舍住十年。
阿Paul解釋，服兵役除咗能夠加強身份認同及認識國情，仲可以改善青年人嘅體能同紀律，學習互相合作同尊重，遠比「光復行動」中嘅所謂「勇武」有意義。佢又話駐軍喺香港有唔少軍營同軍事用地，部分仲位處市區，如果有好多人報名，更可進一步增建宿舍，協助部分港青解決畢業後頭十年嘅住屋需要，等佢哋有時間儲錢買樓，一舉幾得。
佢強調呢個計劃係完全自願，唔係強制服兵役，唔擔心畀人鬧「洗腦」。不過，佢暫時仲未同過任何官方或軍方人士提出呢個大計，未知對方會讚佢有諗頭定係添煩添亂。
