政壇：立會大樓易衝擊難守
各界估計立法會今年六、七月就政改方案進行表決，可能會引起新一波佔領或包圍立法會大樓行動。立法會行政管理委員會之前委託顧問公司研究大樓保安，顧問公司建議四招加強大樓保安，包括喺多處出入口興建三米高鐵閘，但就算行管會最終「拍板」通過有關建議，大樓仲有多個「高危黑點」，示威人士只要用吓腦就可以攻入大樓，睇嚟立法會大樓點補都有窿，秘書長陳維安要再諗吓計仔至得嘞！
設計圖片及對白
白鴿黨近日喺門外張貼告示，表明唔會幫其他訪客開門。
落閘保護唔到玻璃
經歷反新界東北發展示威者成功闖入立法會大樓，同埋佔領人士用鐵馬撞爛大樓玻璃後，行管會即時研究點樣加強大樓保安，保安顧問提出喺立法會停車場出入口、立法會東面出入口同花園設置三米高金屬鐵閘等多項建議，行管會現正諮詢全體議員意見，再決定係咪執行有關建議。
消息人士透露，行管會一旦拍板，秘書處就會即時開工，估計政改表決前可以完成所有工程。不過由於立法會大樓實在有太多玻璃，消息話顧問公司建議並唔能夠百分百解決所有問題，例如佢哋建議加建嘅鐵閘並唔係起喺大樓玻璃出面，而係起喺入面，換言之示威人士依然可以破壞大樓玻璃，不過就會畀鐵閘擋住入唔到大樓，樂觀啲睇總算可以有效制止示威者佔領立法會大樓，但其實根本解決唔到示威者破壞大樓設施嘅問題。
而於佔領行動期間，白鴿黨當時長期租用九樓會議室，等策劃佔領行動嘅團體成員可以入去瞓覺休息，搞到秘書處要限制議員訪客逗留時間。白鴿黨近日喺門外張貼告示，話根據行管會決定，佢哋唔可以幫非白鴿黨訪客開門，又話如果訪客有任何意見，可以直接打電話搵陳維安投訴，好似覺得佢哋無做錯咁。
