城中鏡：傷患無緣用腳踢 「鐵醫」手劈西瓜
皇仁書院舊生會尋日搞康樂日，幾十個校友齊齊返到母校參加踢西瓜波比賽。有「鐵醫」之稱嘅香港大學外科學系系主任盧寵茂雖然因腳傷而冇辦法參賽，但喺主持完頒獎儀式後，即場劈一個真西瓜，過吓癮之餘，亦同一眾球員分甘同味。
盧寵茂（左）同勝出嘅球員齊齊劈西瓜。
踢西瓜波比賽係皇仁舊生嘅年度盛事，但今時今日嘅小朋友已好少踢西瓜波，舊生會行勻港九新界都買唔到，索性搵大陸工廠大量訂造。雖然落場玩嘅校友個個年紀有番咁上下，但踢波時都搏到盡，仲踢爆咗個波添！盧寵茂因為腳患而冇落場踢，但比賽完之後就「劈西瓜」，一樣咁盡興。
盧寵茂話當年因為校舍細，校方一直唔畀學生喺校內踢波。直至佢中三時，體育老師引入西瓜波，自此踢西瓜波成為皇仁仔嘅傳統。佢小時候好鍾意踢，喺屋邨踢拖嚟踢波，諗起就回味無窮。
