先導研究需兩年 地底發展待何時
開講有話，一個巴掌拍唔響。香港近年發展原地踏步，競爭力每況愈下，固然因為社會泛政治化，政客為反對而反對，阻頭阻勢，港產官僚做嘢拖拖拉拉，一味歎慢板，同樣難辭其咎。好似發展城市地下空間咁，由○八年講到依家，拖咗七年至話開始研究喎，問你服未。
呢，立法會工務小組日前通過撥款七千萬元，就銅鑼灣、跑馬地同尖沙咀等多區發展地下空間進行先導研究，預計有關研究一七年完成。你話嘞，先導研究都要兩年時間，跟住可能仲要「深入」研究，同埋公眾諮詢，搞得嚟可能又要拖多七年至有機會拍板。七年又七年，莫講話興建地下城，登陸月球都得喇！
仲有喎，雖然今次撥款反對派政客冇再玩嘢，但唔代表之後萬事大吉。有議員擔心地下城會增加周邊交通及旅遊設施負荷，並觸及業權問題，日後動工，分分鐘觸發連場爭拗。家陣冇嘢怕，最怕地下城步西九文化區同港珠澳大橋後塵，不斷爭拗拖拉，不斷延誤超支，結果淪為財政黑洞，咁就大件事喇。
唔係杞人憂天。今時今日香港好似火藥庫咁，隨時辣着火頭，搞到港府寸步難行，唔少對民生有益嘅計劃都因為爭拗太大而難產，新界東北發展計劃就係最典型例子。發展地下空間聽落無疑幾吸引，但最終會唔會又係無米粥，真係好難講喇。
講真，香港地少人多，向高空發展總有個限度，填海又難過登天，發展地下空間，既可提高土地價值，擴大公共空間，又可為庫房增加收入，更可提升旅客接待能力，一舉多得，早就應該做喇。正所謂，他山之石，可以攻玉，外國有好多成功例子，值得香港借鏡。好似日本東京火車站咁，地下街面積超過十萬平方米；新加坡亦早着先鞭，將部分公共設施同交通系統轉入地下，同時提供休閒設施，成為新嘅旅遊景點。
其實唔使講到咁遠，隔籬澳門亦計劃發展地下空間，同香港嘅計劃相似，唔同嘅係，人哋坐言起行，話做就做，香港就議而不決，決而不行，隨時畀澳門後來居上都似。
總而言之，講多無謂，食多會滯，行動最實際。政改就話爭議多多，阻力重重啫，發展地下空間反對聲音唔大，難度亦唔係好高，冇理由一拖再拖啫，係咪！
