城中鏡：王賢訊狗電影麥兜做目標
仁濟醫院副主席王賢訊同太太朱穎詩尋日出席「仁濟醫院新大樓服務啟用典禮」，佢透露將開拍狗狗電影《南山七小福》，會向設計師Eddie許夏林取經。佢話：「我預計一八年上映，而成本都係好大嘅問題，因為2D 同3D 差好遠，2D 人手多，時間長，3D就快啲。」咁係咪想做到卡通片喜羊羊咁呢？佢話：「係目標，想做到麥兜咁響噹噹。」
王賢訊同太太正籌拍狗狗電影，預計一八年上映。
林煒珊同細佬林孝信出席仁濟醫院新大樓服務啟用典禮。
轉頭見另一副主席林煒珊同細佬林孝信，林煒珊話爸爸林建名係前主席，有份參與呢次計劃。佢話：「佢（爸爸）喺廣州做嘢嚟唔到，細佬原本要返工都請假嚟支持。」被問到細佬會唔會入局做總理時，佢話唔會，話要等細佬幫手做吓服務先喎。
做IT嘅林孝信話家姐開聲就一口答應，亦好樂意幫手。而今年將升做主席嘅林煒珊直言細佬會教青年人剪髮，陪吓老人家傾偈，順道可訓練口才。問到林孝信會唔會幫爸爸打理生意？林煒珊直言：「唔好住，等佢做多啲嘢先，我會安排。」
