城中鏡：丁午壽捧國貨 廁板使乜日本買
香港塑膠業廠商會日前舉行新春晚宴，一班業界前輩同年輕新一代聚首一堂，大談行業近況。講起最常用嘅塑膠產品時，除咗杯杯碟碟之外，商會永遠名譽會長丁午壽就自爆家中用緊內地製造嘅智能廁板，仲話好多智能潔廁板都係內地製造，香港都有得賣，唔明點解咁多人鍾意專登去日本買喎。
丁午壽家中用緊內地製造嘅智能廁所板。
鄭凱茵（中）擔任新春晚宴司儀，獲爸爸鄭文聰（左）同媽咪（右）現身支持。
孫榮聰（後右）同弟弟孫榮良（後左）、父親孫啟烈（前左）同爺爺孫建超（前右）三代均為家族生意打拚。
當晚見到唔少新面孔，好似從事電器業嘅成員高家豪，仲有口齒伶俐嘅女司儀Serena鄭凱茵。Serena係香港工業總會副主席鄭文聰嘅女兒，雖然平日好少女性會對工業感興趣，但佢自細跟爸爸接觸環保科技，覺得呢個行業特別親切，讀碩士時亦特別修讀相關科目。
鄭文聰斥拉布窒礙環保
鄭文聰就話立法會議員經常「拉布」導致好多政策通過需時甚至失敗，令環保科技行業在港停滯不前，反觀內地對環保方面支援就好多，香港真係要加把勁先追得上喇！點解塑膠業會扯咗去環保科技呢？其實兩者息息相關，商會主席孫榮聰話以前推出一件新產品，經常都要生產出嚟先觀察到市場反應，而製作模具成本又高，但依家就可以用３Ｄ打印出來畀客戶睇吓係咪啱心水先開始生產，環保好多。
經營玩具生意嘅副主席丁煒章就發現時下小朋友多數鍾意玩電子產品多過玩具，但咁樣對佢哋專注力同視覺方面有影響，所以其公司正不斷摸索有乜嘢新嘅發展方向，例如生產多啲同運動有關嘅器材等，平衡小朋友體能上嘅鍛煉。
