政壇：院校退聯潮分裂新同盟
繼香港大學學生會喺情人節公投通過同學聯「分手」後，八大院校亦開始醞釀「退聯」跳船，相繼搞退聯公投。估唔到呢股退聯潮仲蔓延到政黨，爆發內訌兼分裂。新民主同盟成員兼中大本土學社發起人劉頴匡，前日喺社交網站發表近千字嘅退黨宣言，批評新同盟先表明反對退聯，後對光復行動表示遺憾，令佢覺得該黨已追唔上世代步伐，所以決心退黨。新同盟立法會議員范國威回應話政黨嘅嘢，理念相近嘅就繼續，否則就分道揚鑣，冇乜大不了喎。
唔理解新抗爭思維
提倡退聯嘅劉頴匡喺社交網站話，新同盟不斷嘗試同退聯、光復行動等新興風潮切割，追唔上世代步伐之餘，亦唔理解社會嘅新抗爭思維同路線。佢又指斥新同盟成員唔理解學生退聯背後嘅訴求，亦從未去過現場視察光復行動嘅實際情況，甚至講到身邊嘅年輕人都慨嘆，議會似乎冇一把代表新思維嘅聲音。綜合個人、政黨等因素，佢決定退出新同盟，仲將自己退出比喻為當日新同盟退出白鴿黨添！
范國威回應劉頴匡退出時話，對方只係用手機通知佢哋，仲透露對方倡議中大退聯初期，要求新同盟發表聲明支持退聯，執委會曾多次要求佢當面解釋退聯因由，可惜佢並無理會。佢直斥劉頴匡嘅態度不負責任，又話凡係參與政團組織，理念唔同就分道揚鑣，冇乜大不了。
不過，自從港大退聯之後，各間大專院校都好積極咁搞退聯公投，可以話係牽一髮而動全身。今次劉頴匡因為退聯而同新同盟意見不合，仲搞到要退出。除咗新同盟之外，唔知呢股風氣仲會唔會吹襲至其他黨派呢？各黨派呢輪忙於應付各政治議題之餘，如果仲要擔心埋退黨潮，真係屋漏兼逢連夜雨。
