大學排名跌不休 自甘墮落可怪誰

唔係危言聳聽，英國《泰晤士高等教育》公布全球大學聲譽排名，本港最高學府香港大學由去年嘅四十三位暴跌至今年嘅五十一至六十位，創下歷史新低。而科技大學亦唔好得幾多，由原來五十一至六十位跌落七十一至八十位；中文大學直情百大不入添，你話醜唔醜吖？

本港大學不思進取，排名好似食咗瀉藥咁沉疴不起，但周邊地區就百舸爭流，唔係保持水準，就係後來居上。好似日本東京大學排名十二，新加坡國立大學排名廿四，都係同去年差不多。至於中國清華大學及北京大學就最巴閉，大躍進十位至廿六及三十二位。所以話，逆水行舟，不進則退，香港高校愈來愈不入流，愈來愈邊緣化，問你死未。

話時話，呢個排名係由全球一百四十個國家約一萬名大學學者評分得出，夠晒代表性，香港簡直丟架丟到國際。正如有關編輯話齋，香港排名係咁跌，將來必定自食惡果，事關大學要有良好聲譽先可以吸引國際人才，有人才先可以喺國際舞台佔一席位。香港聲譽跌跌不休，沒有梧桐樹，點引鳳凰來吖。

冇計喇，莫講話港府對高校科研嘅投入一向好孤寒，就算港府真係肯大手筆資助都冇用，事關家陣政治入侵校園，唔少學者淪為政客甚至激進組織頭頭，學生淪為政治打手甚至街頭暴民，不務正業，無心向學。唔使講其他，淨係講嗰個佔領搞手吖，身為法律學者，公然鼓吹學生違法，大學唔追究不特止，仲處處維護，你話係咪匪夷所思吖？

嗱，教育界人士係咁講嘅，香港三間大學排名大跌，可能同本港整體政治社會氣氛有關，令人對本港院校改觀喎。計太一叮話齋，唔係可能，直情係肯定，事關排名調查喺佔領結束後進行，全世界都睇到本港大學師不師，生不生，一味掛住政治鬥爭，梗係令人有不良觀感啦。

正所謂，一剎那光輝唔代表永恒。香港大專教育曾經領先全亞洲，令港人引以為傲，可惜吖，香港不斷沉淪，大學自甘墮落。自己都唔自愛咯喎，神仙都難救吖，叮！