城中鏡：趙式和送藝術品賀家姐添B
名媛趙式和前晚出席藝術中心一個開幕禮，提到家姐趙式明啱啱生咗B仔，對於自己做阿姨，趙式和笑言：「係呀，好開心。」追問家姐有冇同佢分享湊B趣事？佢話：「我又無生過，唔識湊。佢依家喺屋企休息，復原得幾好，我都見過BB幾次。可能係生仔啦，我覺得個BB似Daddy多啲囉。」
趙式和話家姐趙式明復原得幾好。
問到式明會唔會補擺喜酒，趙式和就話：「唔係喜酒，會擺滿月酒，依家好似興一百日嗰種，應該會擺百日宴。暫時未諗送乜嘢禮物畀BB，上次我家姐（趙式平）生嘅時候我送咗幅媽咪抱住BB嘅畫畀佢，係上海藝術家畫嘅。今次可能都送藝術品，因為我唔識買BB嘢，藝術品屋企可以掛，日日都望到，可以望耐啲，或者會買金幣，因為可以Keep得。」
對於自己嘅Gallery喺該藝術中心開幕，佢坦言：「係呀，呢度大好多，有二千五百呎，樓底有十八呎，加上近荷李活道同中環，過嚟好方便，Kim Robinson又喺附近開Salon，附近又有餐飲，好似個小區咁。」佢仲話自己一年要做十個展覽冇時間休息，要努力工作。
