城中鏡：勁減磅換春裝 名人弗爆行善
依家天氣乍暖還寒，但貪靚名媛已急不及待換上靚春裝出騷。仁濟醫院日前舉行周年慈善餐舞會，身兼餐舞會主席嘅仁濟醫院候任主席Vanessa林煒珊着住一襲翠綠春裝現身，令人眼前一亮。
減磅成功嘅葉恭正（左）同太太林麗珍更加登對。
身穿一襲搶鏡春裝的林煒珊（右），忙於招呼靚次伯酒莊莊主Jean-Charles Cazes。
行事低調嘅羅嘉穗（右）現身捧場支持蘇陳偉香。
Vanessa話禮服係本地新銳時裝設計師嘅作品，佢特意配襯外形似本書嘅紅色手挽包，紅配綠，夠晒搶眼。
令人眼前一亮嘅仲有身兼KCMG賽車公司董事總經理嘅仁濟醫院總理Paul葉恭正，佢睇落瘦咗個碼，成個人清減不少。阿Paul話由於體重直逼二百磅，為咗健康着想，早前的起心肝減肥，三個月內成功搣甩三十磅。減磅不外乎食得清淡及做運動，佢為咗確保日行十公里，特登買部跑步機放喺辦公室，得閒就跑，連開會時都搬部機入會議室，邊跑邊開會，成效極佳，一個月就減咗二十磅。
蘇陳偉香卸任在即鬆晒
餐舞會現場，仁濟醫院主席蘇陳偉香卸任在即，當晚心情極輕鬆，不時同好姊妺及嘉賓話家常，包括做過仁濟醫院主席嘅羅氏慈善基金主席羅嘉穗。時下青年問題成為熱話，身為羅氏針織創辦人羅定邦女兒嘅羅嘉穗話，羅氏基金以支援中學生教育為主，所以未來會繼續加把勁，幫手解決青年問題。此外，家族關注新移民同老人問題嘅宏施慈善基金，快將喺葵涌開設新嘅社區中心，實行雙管齊下為社會送暖。
