政壇：搞搞政：大埔鄉委會為主席位內訌

據聞，同樣係委任區議員嘅新界鄉議局副主席張學明為保大埔區議會主席之位，除咗落區直選，就必須循大埔鄉委會主席途徑重返區議會做當然議員，現時大埔鄉委會主席文春輝自然成為佢嘅障礙。原本鄉事派內部最理想係透過協調，令鄉委會最終能夠喺無競爭嘅和諧氣氛下順利過渡新一屆，但據聞文春輝仍然想連任鄉委會主席，即使早已收到風聲張學明要重奪鄉委會主席之位，但仍要焗住落場一戰。

有口痕友透露，文春輝早已聞到味，並部署重返康樂園選區，希望至少保得住大埔區議會副主席之位。不過，建仔亦有意派人出選康樂園選區，令文春輝連任區議員嘅最後機會都可能幻滅。照咁睇，文春輝經此一役，不但輸咗大埔鄉委會主席，連帶區議會副主席、區議員甚至鄉議局執委都一鋪清袋。

當年文春輝為康樂園區議員，因為當選大埔鄉委會主席成為大埔區議會當然議員，因而令康樂園選區議席懸空，如果今次又係因為鄉委會主席一職而失去區議會議席，咁世事真係好玄妙。