政壇：碧桂園業績會高帽橫飛

楊國強始終無解釋出席原因，只一味猛讚台上其餘三位碧桂園管理層全部都「文武雙全」！係喎，聯席總裁朱榮「斌」、總裁莫「斌」與CFO吳建「斌」，三個都有個「斌」字，果然「有文有武」！真係咁啱？定請嘅時候夾過呢？

總裁莫斌亦即時向楊國強回禮，不斷感激楊國強嘅領導，話楊係公司嘅靈魂人物，充滿個人魅力，花唔少心血培訓人才……。睇住啲「高帽」飛來飛去，台下暗叫好武功。

仲記得恒地主席「四叔」李兆基早前話過，有同楊國強研究喺內地興建為長者而設嘅「安居屋」，尋日提起，楊國強話四叔係佢好尊敬嘅長輩：「好開心佢為香港做好事，佢希望我參與……咁我都係香港人，都希望為香港做好事……」咦！聽落佢對嚟香港發展似乎無乜興趣。

計落，呢位碧桂園嘅靈魂人物都年屆六十，幾時退休？楊國強反應快到呢：「你想我退休？我好努力做嘢o架，講退休早咗啲囉！」收到收到，睇嚟Daddy未打算咁快交棒畀女兒，即係集團副主席楊惠妍，又即係中國女首富。想喺業績會上見到「楊千金」，可能要再等多幾年。