政壇：楊偉雄一家擁兩舖兩樓
理工大學前行政副校長楊偉雄，本來篤定擔任創新及科技局局長，最終因為泛民主派議員喺立法會財委會拉布，兩次拖死咗創科局嘅撥款申請，令開局「胎死腹中」，但佢喺上周一就被委任為行政會議成員同特首創新及科技顧問，話咁快佢上周五就完成並向行會提交個人利益申報表。咁快手，睇嚟佢真係早就過咗品格審查，一獲委任就可以申報個人利益喇！
睇番登記冊資料，楊偉雄申報佢太太擁有淺水灣一個夫婦自住單位，太太同時喺灣仔同天水圍各擁一個舖位，而其家族成員則喺碧瑤灣擁有一個住宅單位。另外佢同太太及其他親戚都喺美國共同擁有五個公寓住宅單位，但就冇講邊個城市。
楊偉雄又申報冇擔任任何公私營公司嘅受薪董事，亦冇持有任何公司股份。但申報擔任新民黨顧問、大舜政策研究中心顧問、美國數學學會會員、香港科學博物館諮詢委員會會員、香港東盟經濟合作基金會顧問、史丹福大學商學院香港分會顧問委員會委員等。
18日再闖關 拉布難免
政府講明喺本月十八日會第三度闖關，將成立創科局嘅建議再度提交立會，而泛民早就揚言會再度拉布，拖垮成立創科局，而楊偉雄做過數碼港行政總裁，睇番佢當年成功將蝕錢嘅數碼港起死回生，睇埋佢嘅申報資料，佢都算投資有道，但係佢呢個能力係咪可以應用喺成立創科局呢？冇水晶球真係難估。
楊偉雄尋日就同二十多位工商界、學界及行業協會代表會面，包括立會議員葛珮帆同盧偉國，交流本港創新及科技業發展方向。楊喺會上提出，將研究採用關鍵績效指標（KPI）作為其中一種工具，又指如政府優先應用本地企業科研成果，將有助帶動香港整體科技發展。面對現時立會內拉布困局，佢話天下無難事，只怕有心人喎。
