保育過猶不及 填海難過登天
潮流興環保，一講起填海，唔少人耍手擰頭。其實睇番歷史，香港大部分土地都係靠填海得來，開埠第二年，港英政府已經開始填海造地，大大話話有過百年歷史嘅嘞。
太一叮提起陳年舊事，無非想話畀大家知道，填海並非洪水猛獸，反而係推動香港由小漁村變成國際大都會嘅重要功臣。冇誇張o架，開埠至今，香港填海所得嘅土地面積逾六十七平方公里，容納咗兩成七香港人口及七成商業活動。所以話，冇當日嘅填海，又點會有今日嘅繁榮吖。
嗱，現屆政府提出唔少填海造地大計，仲話要發展岩洞添，土木工程拓展署日前終於向環諮會介紹有關環評報告。報告係咁講嘅，建議喺屯門龍鼓灘、大嶼山欣澳及小蠔灣進行填海工程，預計最快二○二九年陸續完工，可額外供應最多六百公頃土地，其中逾百公頃將用於發展物流園喎。
係人都知，香港乜都唔缺，最缺就係土地，加上周邊地區競爭日趨激烈，香港再唔急起直追，遲早被人淘汰。本來呢，填海計劃可以滿足香港發展需要，可惜報告話喎，雖然填海工程對水質、空氣及漁業無重大負面影響，但其中兩個填海區跟白海豚活動棲息範圍重疊。就係呢個原因，環諮會強烈要求港府縮減填海規模甚至擱置填海咁話。
即係咁，隨着市民環保意識不斷提高，發展必須兼顧保育，冇人會有異議。之但係，兩害相權取其輕，一味盲目保育而犧牲發展，對社會係咪好事呢？試諗吓，香港地少人稠，公屋輪候冊大排長龍，房屋問題不斷惡化，衍生嘅社會問題千頭萬緒，偏偏呢度唔畀發展，嗰度唔畀填海，試問地從何來呢？好似當局提出發展郊野公園及綠化地帶咁吖，環保團體群起攻之，幾乎連提出都係死罪咁款，你話係咪誇張吖？正如孔老夫子話齋，過猶不及，為保育而保育，對大家都冇好處嘅咋。
冇計嘞，依家社會嚴重政治化，日日家嘈屋閉，就算當局有心填海造地，解決房屋問題，都無能為力。淨係大埔龍尾人工沙灘咁簡單嘅計劃，都因為抗議不絕而止步不前，填海造地仲難過登天。話時話，新加坡因為填海造地及引入專才，近年發展一日千里，港產官僚得個恨字。計太一叮話齋，政治困擾呢個死症一日解決唔到，香港乜都做唔成，只會被新加坡愈拋愈遠，叮！
