城中鏡：雷軍創業靠融資 反籲學生勿借錢
小米創辦人雷軍近日叫大學生千祈咪借錢創業，話因為大學生創業失敗率非常高喎。吓，唔通又成功須父幹？但我爸不是雷軍，咁錢從何來？業又點創？雷軍一覺扎醒就創辦咗小米，佢自己係咁講。
雷軍創立嘅小米估值喺四年間暴漲二百倍。（資料圖片）
話說佢四十歲時有一晚，係夢中扎醒，感覺就好似第二日要考試咁，問自己仲記唔記得細個嘅夢想，願唔願意為夢想去努力一生就這樣結束了嗎……結果佢就係咁，喺二○一○年，創辦咗依家市值過千億嘅小米嘞。
講完夢想，返嚟現實，咁到底小米啲錢點嚟？聽講小米創立時得過創投嘅融資，呢幾年亦得到唔少投資者鼎力支持，啲融資次次計落都係差唔多百億港元計。多得咁多位落力揼水，小米估值喺四年間暴漲二百倍，雷軍仲話有信心小米市值會達一千億美元。咁融資同借錢有乜分別呢？
