城中鏡：陳小寶澳洲度歲 行得多食唔肥
「鯊魚女」陳細潔同胞姐陳小寶尋日一同出席活動，陳小寶透露農曆新年同老公去澳洲旅行，而妹妹就留港度歲。此行有乜嘢難忘事？佢笑說：「平時太忙喇，今次最主要都係去休息，好好放假乜都唔諗，食吓嘢玩吓。」咁有冇肥到？佢話：「咁又冇喎，因為平日坐得多，去旅行周圍行，所以食多啲都唔會肥。」
陳小寶（右）喺農曆新年去咗澳洲旅行，而妹妹陳細潔（左）就留港度歲。
肥媽就喺農曆新年去咗美國同仔女、孫兒敍天倫。
肥媽美酒店煲靚湯
轉頭仲見到肥媽，佢透露農曆新年去咗美國一個月，同仔女、孫兒敍天倫，亦有去賭場遊玩。咁當地係咪冇中國節？佢話：「好有氣氛，賭場布置到成個中國，又有樹林。」佢又話食厭咗西餐，喺酒店發現咗電爐，立即出外買肉同鹹蛋煲湯，佢又話：「我出去買肉，叫表弟『班』四隻鹹蛋返嚟，煲咗三日湯，成條走廊嘅人都聞到湯嘅香味，個個都知我煲湯。」肥媽話各家庭成員喺唔同地方飛抵一齊過年，十分難得。
