城中鏡：啟剛河北過年囝囝利是豐收

香港專業及資深行政人員協會日前舉行新春團拜，出席嘅香港青年聯會主席霍啟剛一講起初學行路嘅囝囝中曦，表現雀躍，佢話囝囝漸懂事，所以趁今個新春帶埋中曦返太太郭晶晶嘅家鄉河北過農曆新年。中曦初次學識拱手做恭喜手勢向長輩拜年，人見人愛，逗利是破晒紀錄。

霍啟剛（左）趁新春喺河北一嘗放煙花滋味。

霍啟剛與太太郭晶晶同囝囝中曦去河北過年。（資料圖片）

專資會會長盧偉國（右二）、常務副會長黃偉雄（右一）、香港國際仲裁中心主席王桂壎（左一）同梁智仁互相恭賀。

謝偉銓（中）憂慮收緊按揭會令樓價不跌反升。左右分別為專資會會員吳沚慧同恒基地產營業部副總經理鄧鳳賢。

啟剛話河北過年氣氛濃厚，佢都入鄉隨俗放煙花，轉頭再帶囝囝去北京睇雪景。小朋友睇見地下皚皚白雪，反應搞笑，先是呆了一呆，定神後就跳紮紮，活躍程度似足媽咪。囝囝嘅利是進帳豐收，金額有幾多就唔講嘞，但佢話會將利是錢儲起來，成立教育基金。

謝偉銓批政府加辣得一招

專資會團拜活動上，又見到專資會前會長謝偉銓，講起政府再加推樓市「辣招」，透過金管局收緊按揭，佢直言措施並無對症下藥，無助解決樓價高企問題。佢話市民無咁多錢上車，惟有打細價盤主意，勢必進一步推高小型住宅樓價，批評政府調控樓市，只得一招，未有全盤周詳規劃，有必要好好檢討。

樓價高企，高官、市民都唔好過，但點煩都唔及殺到埋身嘅流感。醫院管理局主席梁智仁月前都感冒，雖然佢係西醫出身，但都幾好中藥，感冒初起時會食少許枇杷膏，當堂舒服晒。但佢強調呢招未必人人合用，若然覺得感冒發燒，都係病向淺中醫喎。