政壇：搞搞政：立會方剛交棒富貴黨勢危
富貴黨盤據立法會批發及零售界議席多年，如今方剛講到明下屆會交棒，但到底該黨係咪真係有人接到棒，一直成疑，因為有唔少人都對呢個議席虎視眈眈，除咗已曝光嘅「假髮大王」趙振國同裕華國貨董事副總經理余鵬春外，最近業界又傳出另一位人選，就係「電飯煲大王」蒙民偉之子、信興集團主席David蒙德揚。
設計圖片及對白
聽聞一直低調嘅David，近年開始活躍業界活動，仲不時話希望為香港社會貢獻一分力。由於佢公司嘅電器係香港各大家電器舖嘅主要貨源，應該有唔少「鐵票」。我哋尋日問過David係咪有意出選，佢就話直至呢一分鐘為止都無諗過參與選舉，因為公務實在太過繁忙喎。不過，當我哋問佢會否斬釘截鐵話唔參與選舉時，佢就話永遠唔會排除任何事。照佢咁講，似乎佢都唔想將件事講得太死，以免將來無彎轉。
兩大票倉換班現隱憂
其實富貴黨除咗面對議席競爭外，仲要面對另一隱憂，因為該黨喺批發及零售界兩個大票倉，即係香港化妝品同業協會及香港零售管理協會，兩大會嘅話事人莎莎國際主席郭少明同麥瑞琼都將會夠鐘卸任，前者因為唔可以連任三屆而要在今年中退下會長一職，而後者明年亦要卸任。
過去多年兩人都算幾支持富貴黨，佢哋卸任後，接掌號令呢兩大協會嘅人士如果唔支持該黨，咁該黨喺批發及零售界都可以話係凍過水，難以力保議席。所以有知情人士叫大家留意定，到底係乜嘢人頂替郭少明同麥瑞琼，從中應該預測到富貴黨能否保得住個議席。
