政壇：爛帳放上網一樣有人淘
淘寶乜都有，連專門處理不良資產嘅中國信達都潮起嚟，首次喺淘寶放咗幾項壞帳資產畀人淘，競價八粒鐘已有超過五千點擊，其中兩項成功賣出，仲有幾口叫價。
係淘寶近期搞咗個資產處理平台，可拍賣銀行股權甚至知識產權。（互聯網圖片）
不良資產，即係啲到期但未收番嘅貸款或應收帳、積壓嘅呆滯物資或投資之類，總之係唔多周轉到嘅資產；而信達嘅主業，簡單講，就係以折讓價收購企業啲不良資產番嚟，搞搞佢再套現賺錢；即係好似你平平哋買架就咁睇冇乜人要嘅二手車番嚟，執靚佢，又或索性拆件，再賣番出去。信達今次喺淘寶成功賣出嘅，係兩家內地公司嘅壞帳資產，一家喺寧波，一家喺浙江，成交價分別係二千零五萬同四百四十一萬人仔。
信達今次用嘅，係淘寶近期搞出嚟嘅資產處理平台，雖然人流未及零售平台天貓咁墟冚，但勝在資產夠爆，由起拍價五百蚊人仔嘅iPhone 5，到幾百萬嘅城商銀行股權，甚至成千萬嘅飲品生產知識產權，都有得淘。
