政壇：盧吉道建酒店「施」篋計

依家行山除咗有機會野生捕獲影星周潤發，我哋日前行經山頂盧吉道亦捕獲百仁基金前主席Jaime施榮忻。家住赤柱嘅Jaime透露好鍾意去盧吉道跑步，平日亦會經灣仔峽道上山，但難度大好多。既然對盧吉道情有獨鍾，有冇簽名反對發展商擬將盧吉道大宅改建酒店？Jaime坦言冇簽名，認為財團要發展好難阻止，但認同盧吉道實在太窄，根本冇位畀接載住客嘅電動車同行人同時經過；佢反建議旅客既然入住盧吉道，就應順應酒店特色，自己拖篋沿盧吉道行入酒店喎！有傳Jaime係青年事務委員會主席接棒人選，佢再否認傳聞，未有人搵過佢，仲自言未夠班做主席添！