政壇：肥仔明吹雞 反AV仁搞公投
白鴿黨立法會議員「AV仁」何俊仁早前宣布，計劃喺否決政改方案之後辭職發動變相公投，以推翻全國人大常委會「八三一」決定，要求重啟政改。之不過，黨內對AV仁嘅大計都意見紛紜，該黨下月就會召開會員大會，畀會員投票表態，能否獲通過依家仲係未知之數。
李華明（圖）話會游說其他黨友反對ＡＶ仁搞辭職公投。（資料圖片）
一直擔起白鴿黨籌款委員會主席重任嘅前立法會議員「肥仔明」李華明，就講明唔支持AV仁搞辭職公投，嚟緊會游說其他黨友反對，仲話如果最終通過支持AV仁嘅話，佢都唔識點樣再幫個黨籌款，不如唔做籌委會主席咁話。梗係啦，辭職發動變相公投動輒要個黨花費幾百萬元選舉經費，睇嚟AV仁要搞公投，都要過咗肥仔明嗰關先。
