政壇：暴民反水客快必執手尾
整個泛民主派嘅政治板塊近年已四分五裂，而泛民內嘅激進勢力更加好似細胞分裂咁，隔一年左右就自動分裂，依家激進派都分成幾個陣營，壁壘分明。好似喺早幾日「反水貨客」行動嘅示威者，一日內突襲屯門、尖沙咀同上水三處，暴力、野蠻行徑令人髮指，被狠批為「暴民」，事後警方總共拘捕七人，當中有啲仲係中學生添。但估唔到單係今次嘅拘捕行動，都引發人民力量同組織反水貨客行動嘅激進派政團劃清界線。
設計圖片及對白
人力成員「快必」譚得志尋日就喺社交網站以「人民力量執手尾」為題，大呻今次反水貨客遊行，熱血公民同本土民主前線都有份組織，但事後被捕示威者求助無門，兩個組織亦都無晒影，最終，有示威者家屬向人力求助，人力即刻聯絡義務律師協助一位被捕嘅十五歲少年搞保釋支援。
拒參與「義和團式」行動
其實，人力從來冇參與過星期日嘅反水貨客示威行動，咁點解又要出手相助呢？快必坦言，正正因為有街坊求助，令佢最擔心係有街坊以為人力有份參與今次「打水貨客義和團式」行動，所以要同呢種行為劃清界線。
快必又話，今次係「本土民主前線同熱血公民配合港共搞出嚟」，但又要人力執手尾，真係多謝晒佢哋兩個組織囉！人力同熱血互片唔係第一日嘅事，睇怕激進派呢啲恩恩怨怨，一時三刻都唔能夠化解，怕且要去到年底舉行嘅區議會選舉時，先可以埋單計數嘞！
