通街山寨電池 尿袋好唔安全

今年一月之嘛，有手機充電器突然喺機場快線列車上爆炸冒煙，要出動消防員撲救，所有乘客疏散，雖然意外中無人傷亡，但唔係次次都咁好彩。之前有內地空姐喺屋企一邊充電一邊煲電話粥，結果觸電身亡，真係前車可鑑o架。

即係咁，手機充電器賣到成行成市，格仔舖、散貨場甚至街邊小販一樣有得賣，價錢仲平過正貨一大截，吸引唔少人幫襯，搞到幾乎「人手一袋」咁滯。之不過咁，平嘢冇好貨，呢嗱，有市民試過喺格仔舖購入充電器，用咗無耐發現手機充電時發出高熱，唔驚就假。聽吓學者點講啦，後備電池如果有防止短路功能，又或者有塊薄膜，一積聚氣體就會穿，就可以防止爆炸，但山寨貨為咗慳皮，加上薄膜又係專利技術，九成九都唔會有呢啲安全措施。咁即係點？即係分分鐘可能出事囉。

點解呢類山寨充電器可以賣通街？消費者貪平固然係原因，當局監管不力更加難辭其咎。依家鋰電池產品話就話已經納入《消費品安全條例》同《商品說明條例》，由海關負責執法，但海關過去兩年淨係巡查過十二次咁大把，測試市面三十幾個樣本咩，又乜嘢發現都冇。你話嘞，後備電池事故無日無之，咁都查唔出問題，唔係監管不力又係咩吖。正如有立法會議員話齋，海關根本冇機電專業知識，與其旨意呢班外行人執法同監管，不如訂立專門條例規管，保障市民安全好過喇。

話時話，山寨電池除咗係大殺傷力武器，亦係地球生態殺手。事關山寨貨質量差折舊率高，大大增加廢舊電池棄置量。鋰電池需要長時間分解，重金屬更有機會透過土壤積聚喺農作物內，對人類嘅腦部、肺部等器官造成極大破壞，導致癌症。其實外國好多地方已經強制回收舊手機電池，反觀香港，想搵個回收站仲難過登天，不知落後人哋幾多年。

講多無謂，行動最實際。既然港產官僚自己都用智能手機，咁就唔該做好自己份工，加強監管，如果唔係，炸彈無眼，尤其係好多人將個手機連埋充電器袋喺褲袋，一個唔好彩真係會炸掉尿袋o架，叮！