城中鏡：星之子新影相系統 陳繁昌率先玩
尋日輪到科技大學舉行傳媒周年聚會，雖然已過農曆十五，校長陳繁昌依然率領副校長同協理副校長同傳媒拜年，而校友「星之子」陳易希仲專登返嚟母校撐場，並帶咗佢公司研發嘅影相系統，陳繁昌即刻親身試玩，其後仲同傳媒一同合照。
陳易希（左）嘅公司研發影相系統，陳繁昌（右）即時親身試玩。
陳校長話好鍾意有科大英文縮寫嘅鴨嘴帽。
當年憑機械人發明一鳴驚人嘅陳易希話，自己畢業後就同朋友合夥開科技公司寫App，創業半年已經有錢賺，上年公司生意額差唔多有八位數字，淨賺七位數，仲話適當時機會考慮將公司上市。
除咗試玩陳易希公司研究嘅影相系統，一身西裝打扮嘅陳繁昌隨身有頂印有科大英文縮寫嘅鴨嘴帽，佢自言私底下好鍾意鴨嘴帽，尤其有科大標誌嘅帽，一來唔怕曬親個頭頂，仲可以推廣學校喎。
