政壇：港交所擬勁加主席袍金

港交所份薪酬委員會報告披露，港交所委任嘅獨立顧問，建議今年度將主席酬金加到二百一十萬元，但建議仍要喺今年四月二十九日舉行嘅股東周年大會（AGM）上通過。

周松崗舊年喺港交所收取嘅袍金總額達二百三十六萬元，按年上升百分之二十三，若果建議獲得通過嘅話，今年收取嘅總袍金肯定更「和味」。

睇番周松崗嘅前任夏佳理，卸任前嘅主席袍金係五十五萬元；李業廣由○○年至○二年更加冇收過酬金。但時移勢易，港交所依家size大咗咁多，又收購埋LME（倫敦金屬交易所），管咁多瓣嘢，主席工作量大過以前好多。

另外，李小加今年一月起亦有人工加，每年底薪由八百六十五萬元，增至九百萬元，上升百分之四。不過，底薪向來只係濕濕碎，小加份人工最大舊嗰部分係現金花紅同股份獎授，動輒會有幾千萬元o架！