政壇：區會執正規則防泛民
白鴿黨「峯鴿」許智峯之前大鬧中西區區議會，除咗搞到中西區區議會事後開會都小心翼翼，仲令其他區議會都提高警覺，擔心該區嘅泛民主派區議員會有樣學樣喺會議上搞搞震。據聞有多個區議會有意檢視區議會議事規則，將入面某啲寫得唔多清晰嘅條文「執正啲」，例如寫清楚會議響鐘點算法定人數時可唔可以繼續開會，費事有人有機會利用議事規則鑽空子。
設計圖片及對白
免惹人口實
沙田區議會主席何厚祥話，雖然民政事務總署為十八區區議會制訂一套議事規則，但由於呢啲規則有唔少灰色地帶，加上十八區區議會各有特色，唔係條條議事規則都可以應用喺咁多個區議會身上，所以各區區議會平日議事都未必會跟足所有議事規則。
不過，自從峯鴿大鬧區會一事曝光後，唔少區議會主席都覺得要「執正嚟做」，費事有機會惹人口實，指區議會帶頭唔按本子辦事。何厚祥舉例指，唔似得立法會喺響鐘十五分鐘期間要暫停會議，等夠人先至可以恢復會議，區議會議事規則無寫明響鐘數人時會議可唔可以繼續，所以唔少主席都會喺呢十五分鐘內繼續會議，等區議員同官員可以繼續發言，直至十五分鐘後真係唔夠人先宣布流會。
為咗唔想有議員利用呢個灰色地帶批評區議會唔跟程序，何厚祥話沙田區議會有意喺議事規則內寫明響鐘數人期間唔可以繼續開會，一定要等夠人先可以恢復會議。佢透露唔少官員聽到後雖然無即時反對，但就擔心會議時間加長要要開多幾次會。但官員用公帑出糧，開會都係分內事，似乎又無乜投訴嘅基礎嘞！
咦！西貢區議會都有啲反斗議員，例如「哪吒」方國珊喺反對擴建堆填區都好激吓，而身兼立法會議員嘅范國威亦經常有出位行徑喎。據聞有個別議員曾提出想「執正啲」，但區議會內意見不一，睇怕暫時未做到。
