拉布打爛飯碗 政客害人不倦

嗱，忍無可忍，毋須再忍。過千名建造業工人尋日齊齊站出來，由遮打花園遊行至立法會大樓，聲討反對派政客喺立法會拉布，搞到工程撥款由二○一一年嘅一千六百億元暴跌至上年度嘅三十六億元，今個年度亦只有七十九億元咁大把，比沙士時期更少，導致工人開工不足，手停口停，要求佢哋收手咁話。

被打爛嘅點止工人飯碗吖，唔少中小企因為未能承接政府工程，面對周轉不靈嘅窘局，分分鐘倒閉結業都似。一榮俱榮，一損俱損，政客為反對而反對，為拉布而拉布，隨時搞到建造業一條龍收檔，無數家庭冇飯開，你話係咪罪孽深重吖？社會亂象叢生，真係多得政客唔少。

政客成日話拉布係針對政府，實情係點？其實官老爺一樣安坐其位，享受高薪厚祿，政客愈係拉布，政府愈係癱瘓，官員愈係樂得逍遙，受害嘅只係香港經濟，打工仔首當其衝。有人係咁講嘅，清除阻街路障容易，清除議事堂內阻頭阻勢嘅人形路障先至艱難，真係一啲都冇講錯。

話時話，時間就係金錢，反對派不斷拉布，唔止令工程延誤，更令成本暴增。其他唔講，淨係講十大基建，保守估計合共超支逾千億元，其中港珠澳大橋香港口岸工程，當初核准預算大約三百億元，家陣估計最少要加碼五十億元，最終要使幾多錢，真係冇人話得埋。更弊嘅係，香港自己衰不特止，仲要連累無辜，就講港珠澳大橋吖，隨時禍及珠海及澳門通車無期，簡直係佗衰家。

仲有呀，當局日前披露，有二十二項工程因為無法如期撥款上馬而被拖延一年，要喺今個年度重新申請撥款，其中十七個總值逾百億元項目，需增加約七億撥款應付通脹。欣澳填海規劃研究嘅支出更飆升八成六至一億元添。小數怕長計，何況一超支就係億億聲，政客拉布同倒錢落海根本就係同一回事。

冇計嘞，港產官僚廢柴兼無能，一味被反對派牽住鼻子走，香港有乜辦法唔烏煙瘴氣、七國咁亂吖。正如車公話齋，色則是空空是色，香港氣數將盡，睇怕好快由國際大都會變番小漁村咯，叮！