城中鏡：楊張新悅認貪心
教育局前政治助理楊哲安同太太楊張新悅育有三名囡囡，楊張新悅尋日出席一個慈善活動時話細女出生剛好五個多月，已非初任母親嘅佢話細女好易湊，佢話：「其實都想返去見佢，另外兩個女同爹哋去消防局做地區工作。因為細女太細，我怕我母性大發不停攬住佢，會阻到活動進行，加上湊住佢唔可以着高踭鞋。」
楊張新悅同兩個小朋友合照，笑得開懷。
冇諗住追生仔
生咗三個都仲咁黐住？楊張新悅話：「已經冇日日負責幫佢沖涼，之前兩個女日日幫佢沖。三個女冇互相呷醋，不過自己好貪心，想做好媽咪、好老婆同有事業，所以都幾分心。」佢又話依家身體狀態暫時尚可，但就比較容易攰，仲話直情唔夠瞓。咁會唔會再追生仔？佢話：「唔追，其實一直都冇特別去追，生多兩個都會當係上天畀我嘅禮物。」
