政壇：搞搞政：傳侯強謀掌北區議會

或再染指鄉局副席

新界二十七個鄉委會本月起開始換屆，上水鄉委會主席侯志強（侯強）相信坐定粒六連任，同時據聞侯志強嘅野心不止於此，有鄉紳就支持佢進攻北區區會主席，單挑現任主席、來自建仔嘅蘇西智。

建仔依家坐擁北區區議會十二席，佔所有議席一半，鄉紳勢力緊隨其後。有村民坦言，隨住北區區議會取消三個委任議席，只要鄉紳爭氣啲全取新增民選議席，牌面上絕對有機會爭贏做區議會主席，進一步削弱建仔喺新界嘅力量。

聽聞侯志強不但瞄準北區區議會主席，就連五月換屆嘅鄉議局副主席之位都有意染指，勢要取代同蘇西智一樣來自建仔陣營嘅現任副主席張學明喎。對於有傳會更上一層樓，侯志強話自己對政治冷感，擔心爬得愈高，跌番落嚟斷手斷腳就唔好啦，好好哋做上水鄉委會主席就於願足矣，真係信不信由你。

但無論係真定係假都好，建仔都不甘白白斷送北區區議會主席之位，據聞該黨有殺錯無放過，決定派出沙頭角鄉委會前主席劉天生挑戰現任主席李冠洪，希望劉天生重返北區區議會任當然議員，喺下屆區議會主席選舉上，幫建仔箍得一票得一票。咁就意味雙方提早開戰，實好戲連場嘞！