政壇：「五大」倡開論壇商退聯

繼香港大學學生會通過退出學聯公投後，中文大學、理工大學、城市大學、浸會大學同嶺南大學亦相繼有學生組織退出學聯關注組，並醞釀公投退聯。該五間院校嘅退聯關注組近日集合力量，聯合向學聯發出公開信，正式邀請眾院校嘅學聯代表共同籌備聯合論壇，以便雙方可同場各陳己見，解釋留喺學聯或退聯嘅利弊。

公開信指出，過往部分院校已就退聯舉行多次論壇，仲邀請學聯代表交代學聯近況，有見各關注組同學聯雙方嘅論述都有所調整，關注組認為往後再分開舉辦論壇未免費時失事，因此希望籌備聯合論壇，畀學聯代表同各關注組同場向學生講解各自嘅理念，讓學生喺公投作出抉擇係咪退聯。

嶺大將喺周二至周四展開公投表決退聯議案，或成為第二間退聯嘅大學，中大、城大、浸大同理大亦已收集數百名學生聯署，預計可以喺本月中陸續啟動公投退聯程序。