政壇：樹根寸佔中貪威怕死
年底就會進行區議會換屆選舉，有多年區議會經驗嘅立法會議員鍾樹根，日前接受黨友阿Ann蔣麗芸訪問時，被問到做咗咁多年區議員，有乜嘢令佢覺得最自豪。樹根就憶述九二年時帶領漁民佔領中環海港兩個鐘，抗議填海影響漁民生計，仲爭啲搞到政府要開槍添，好彩最後和平解決，仲成功幫漁民追討二億幾元賠償。樹根豪言「死就死」，寸爆之前嘅佔領人士「又要威，又要戴頭盔」！
（設計圖片及對白）
樹根話當年玫瑰園基建計劃要挖沙填海，漁民因為咁失去生計，於是搵咗啱啱當選區議員嘅佢求助。其實當時政策已經刊憲一年，奈何漁民唔識字，所以睇唔到。佢曾經搞過一連串海上大遊行、封鎖海港抗議，仲一度佔領中環海港兩個鐘，希望幫漁民爭取賠償，但政府嘅態度都好強硬，仲話漁民一過警戒線就會開槍。
拒選特首 推畀阿Ann
好彩當時有立法局議員肯做和事老，政府開會後亦承認溝通不足，最終決定賠償漁民二億五千萬元，樹根自此被當成漁民領袖，到依家都搣唔甩。講完一輪區議員生涯，阿Ann又話聽到消息，有傳樹根可能參選下屆特首。雖然可信性極低，但樹根都做戲做全套，即刻耍手兼擰頭話自己唔掂，仲話「做呢個位，命都唔長呀！」佢仲將個波推番畀阿Ann，話對方八字好，應該頂得順喎。
另外平時阿Ann主持節目時，通常會擺盆花喺隔籬，但今次就因為受訪嘉賓係樹根，所以轉咗擺盆草喺度，佢仲解釋話「『樹根』嘅意思係扎根於土壤」。不過，樹根嘅思路已經跳咗去另一層次，笑笑口話「你（阿Ann）怕我拈花，寧願我惹草」，阿Ann亦回敬番一句「依家我惹草就真」，認真搞笑。
