外判貨倉零監管 香港郵政多甩漏

唔係亂噏，如果你幫襯香港郵政，隨時會有咁嘅結果o架。話說香港郵政舊年六月開始，將寄往海外嘅郵包存倉服務外判出去，之後就關人個關，搞到烏龍百出，問題多多。有知情人士向本報爆料，指外判商喺粉嶺有兩個貨倉，其中一個每日要儲存一萬個郵包，但地方又唔夠，焗住向高空發展，除咗用電動唧車將郵包向天花擠壓，又用電動鏟車壓細郵包騰出空間，好似玩疊羅漢咁，結果唔少郵包被壓到變形穿窿，有寄件嘅結他連柄都甩埋添，問你怕未。

郵包甩皮甩骨事小，消防危機四伏先至大鑊。爆料人提供嘅照片顯示，唔少郵包疊到天花咁高，擋住灑水系統，消防喉轆堆滿雜物，休息室更加存有石油氣罐，側邊仲有煙灰缸，萬一有人食煙引爆石油氣罐，後果真係不堪設想。

有立法會議員就講得啱嘞，香港郵政將服務外判後，跟手連責任都外判埋，巡查求求其其，唔出事至奇喇。

話時話，郵政官僚出名敷衍塞責，旨意佢哋加強監管喎，嘥氣喇。係人都知，香港郵政近年服務不斷插水，早就有口皆悲，淨係「失信於民」已經令人怕怕，唔怪得業績年年見紅喇。過去兩個財政年度，香港郵政蝕咗過億元，唔係冇原因o架。一間公司連年虧損，正常梗係諗吓點樣改善服務啦，偏偏香港郵政反其道而行，一味諗縮數，關閉郵局、裁減員工、縮短服務時間、將郵包存倉服務外判，簡直係絞盡腦汁。其實正如有人話齋，要改善郵政服務，唔係冇計嘅，只要食住網購嘅潮流，同物流公司合作，將部分零售點闢作物流點，就有大把生意做喇，可惜吖，郵政官僚懶懶閒，根本不思進取。

服務差都算嘞，最離譜係不務正業，充當政治打手。呢，早前嗰單涉嫌違法滋擾東方報業集團嘅醜聞，香港郵政話就話展開調查，但拖到依家仲未有結果。如果話消防處不務正業，亂象叢生，應該改名「消閒處」，咁香港郵政無事生非，居然走去打壓傳媒，都應該改名「香港亂政」咯。

港府成日話要量入為出，開源節流，既然係咁，不如索性摺埋香港郵政，咁咪唔使年年蝕錢囉，反正依家私人速遞公司開到成行成市，係咪！