由於泛民主派拉布,兩度拖死咗成立創新及科技局,特首CY梁振英早前隨即變陣,宣布委任原定嘅創科局局長人選楊偉雄,出任包括新增嘅特首創新及科技顧問、經改組後嘅創新及科技諮詢委員會主席同行政會議成員等三項公職,惹來泛民議員狂轟,就連本身支持成立創科局、兼反對其泛民盟友拉布嘅立法會資訊科技界議員莫乃光,亦有公開質疑楊偉雄嘅代表性。

但我哋發現,原來莫乃光鬧完人之後,第二日就急急去信立會資訊科技委員會,要求楊偉雄到委員會解釋佢嘅願景同工作計劃,認真矛盾。

其實又好難怪莫乃光嘅,佢喺創科局拉布戰中兩面不是人,如大力反拉布撐政府就會得罪盟友,任由泛民拉布又得失選民。如果佢再學其他泛民咁,為咗政治理由同針對CY而堅拒同楊偉雄打交道,同政府嘅創科政策及一眾業界選民只會愈行愈遠,想連任都幾難。惟有學全國人大委員長張德江咁講,口講反對,心裏支持喇!

創科局三闖關吉凶難料

講開又講,楊偉雄接受任命後尋晚首度現身資訊科技界嘅公開活動,出席咗一個業界春茗。問佢因創科局難產而冇局長做,被迫大幅減薪改任行會成員,佢話之前已經預料到,但稍後第三次「闖關」會否再次觸礁,佢就話吉凶難料,並爆咗句英文諺語「When the going gets tough, the tough get going」,大意係會迎難而上喇!佢又笑言,孫中山搞革命都搞咗十一次先成功,唔通佢預計創科局撥款最少要流產十次?

談及會否應邀去立法會講下創科局嘅願景,楊偉雄又引用已故蘋果電腦公司創辦人喬布斯嘅名言,話冇可能講得出六個月後嘅願景,始終無答去定唔去。耍太極咁叻,果然係局長人選。

第一手消息請下載on.cc東網iPhone/iPad/Android/Windows Phone Apps