政壇：李周美枝勢掌女童軍
話時話，香港女童軍總會近年傳出過唔少負面新聞同是非，包括前總監邊陳之娟被揭違規「超齡」連任，之後進行改選時又爆發內訌，仲被指霸咗佐敦加士居道豪宅區一幅靚地做新總部會址，但拖足幾年都唔發展等。近日又傳出該會現任總監何超鳳突然劈炮，原本三年任期做咗唔夠三分一就唔撈。
李周美枝（左）預計會喺無對手下任女童軍會總監。（資料圖片）
消息話，喺舊年四月先正式上任嘅何超鳳，早前提出想提前離任，一眾高層商討後，最後協調出其中一位現任副總監李周美枝接替，下周就會進行改選，當選後仲罕有地即時上任。不過，消息強調今次事件並唔涉及任何內訌或不和，純粹係因為何超鳳本身工作繁重，加上新總部工程即將展開，會務工作亦多咗，何超鳳自覺兼顧唔嚟先向其他姐妹求助。
李周美枝喺女童軍會服務咗好耐，並喺一一年角逐過總監一職，最後輸咗畀何超鳳嘅上手彭徐美雲。李太依家主要負責總會嘅地區發展工作，之前亦處理過國際事務，今次雖然係臨危受命，但相信佢會駕輕就熟。
