中華廠商聯合會常務會董Simon黃家和,早兩日同兒子Howie黃浩鈞、女兒黃嘉卉共度一個好特別嘅「親子」活動,佢哋齊齊上惠州跟「飄移教父」施建民學飄移。三位初哥初姐由朝到晚特訓九個鐘,結果Simon表現最出色,畀施建民盛讚係佢教過年紀最大但最快上手嘅學徒。Simon就讚一對仔女嘅飄移技術叻過佢,仲話計劃考慮成立「黃家軍」出賽喎。

黃家和(前中)、黃浩鈞(前右)及黃嘉卉(後右)跟施建民(後中)學飄移,過足車癮。(受訪者提供)

Howie話今次係爸爸主動提出建議,佢哋三人均係首次學玩,當日由朝早九點玩到傍晚六點,喺師傅帶領下,佢哋嘗試包括八字飄移、一百八十度急速過彎等技巧,夠晒新鮮刺激。Howie話今次為期一日嘅訓練令佢過足車癮,仲可以提高駕駛技巧,日後揸車遇到落雨雪或突發情況,都唔使再騰雞嘞!

第一手消息請下載on.cc東網iPhone/iPad/Android/Windows Phone Apps