政壇：獲委科大廖長城靠「清白」
喺香港科技大學校董會原主席張建東舊年九月因病過身後，該職一直由副主席、全國政協常委唐英年嘅堂弟唐裕年署任，政府尋日終於宣布委任行政會議成員廖長城接任科大校董會主席，任期三年。廖長城本身係資深大律師，除咗專長打知識產權案之外，同科技及大學似乎無乜關係，凸顯現屆行會成員可以出任大學要職嘅人選唔多，揀無可揀。
政府委任廖長城做科大校董會主席。（資料圖片）
政府向來喜歡委任行會非官守成員兼任大學校董會主席，主要貪行會成員信得過，例如張建東獲委任時本身亦係行會成員，嶺南大學校董會前主席陳智思亦係行會一員。
之不過現任行會成員中，唔少人都與唔同嘅大學有「仇口」或者利益衝突，包括做過教育統籌局局長、出任中文大學校長時以鐵腕同獨裁而聞名嘅李國章；做過教統局常秘、曾被指干預教育學院內部運作嘅羅范椒芬；早前剛獲委任做大學教育資助委員會成員嘅張志剛，亦遭到唔少大專師生質疑。廖長城過往做過嘅教育公職雖然唔多，但勝在「身家清白」無乜新仇舊怨，估計呢次任命唔會引起太大爭議同反彈。
