政壇：電腦學會搞「FACE」吸女
嚟緊星期日就係三八婦女節，早前先話有啲藍籌公司連女董事都冇個，香港無論係金融界定科技界，都係「陽盛陰衰」，女少過男。姊姊妹妹們，究竟去咗邊？香港電腦學會會長兼中信銀行（國際）資訊科技及營運總監Michael梁建文同樣唔明白，現時專上學院讀資訊及通訊科技嘅女生實在唔少，但畢業後，大部分唔會做番本科嘅工作，又或者做一、兩年電腦就轉行。齋睇電腦學會會員，女性會員唔夠兩成，可見失衡情況有幾嚴重。
梁建文（前左二）新近成立咗「FACE Club」吸女會員。
於是Michael佢哋決定吸女。點吸？近期佢哋成立咗個「FACE Club」望將女會員比例增至三成。FACE？入會睇樣定講面子？FACE其實係指Female、Attract、Connect、Engage，FACE Club旨在連繫更多行內女性參與業界活動，吸引佢哋選擇資訊及通訊科技作為終身事業。FACE Club呢個月下旬就會開成立Party，年內仲會舉辦活動表揚業界傑出女性。
