政壇：立會紀念品擺攤散貨
喺舊年擾攘多月嘅佔領行動，唔單止令佔領區內嘅商舖生意大減，訪港旅客都掉頭走，而位處佔領重災區嘅立法會大樓當然難逃一劫，佔領期間不但累議員開會唔成，原來連立法會嘅訪客活動，好似每日都舉行嘅教育導賞團同售賣紀念品嘅生意都大受影響，結果積存大量紀念品賣唔出，年度埋單肯定出現負增長。立法會秘書處為咗散貨扭盡六壬，惟有喺大樓內周圍擺賣硬銷，務求清倉。
製品預算狂跌58%
我哋早前翻查立法會行政管理委員會嘅管制人員報告，發現立法會喺議會聯繫和教育及訪客服務方面嘅指標全線插水，好似一四/一五年度學生同市民參加立法會教育導賞團嘅預算人數，都分別下跌逾兩成半同百分之六；製作嘅紀念品更預算按年狂跌五成八。
此外，立法會圖書館預算一四/一五年度嘅使用人次亦低見一萬二千人次，按年度勁跌四成半，真係滿江紅。
無他嘅，立法會大樓早喺舊年六月，已經因為遭受反新界東北發展嘅示威者衝擊，撞爆晒玻璃門而隨即取消所有導賞服務，以免有示威者混入導賞團趁機發動衝擊。其後佔領行動爆發，立法會大樓成為佔領核心地帶就更加重門深鎖，閒人免進。無訪客參觀立法會，又何來有人買紀念品呢？結果佔領行動過後積壓大量存貨，搞到秘書處好頭痕。
想散貨？減價當然係最直接，但立法會使嘅一分一毫都係公帑，為咗唔想因為亂劈價而招人話柄，惟有趁農曆新年假期前，將紀念品由原本指定喺地面專門店出售，分散喺流動攤檔擺賣，只要有市民組團到訪就擺晒出嚟，希望增加曝光率博多啲人買；秘書處仲不惜喺議員接待訪客嘅五樓咖啡閣擺檔，同樣都係出鏡希望有善長好心買番一兩支筆咁。不過，計我哋話，秘書長陳維安應該帶頭入貨先囉！
