公園蚊群亂舞康署防患不足
公園乍現「龍捲風式」蚊群，令晨運客飽受驚嚇！城門谷公園環境清幽，吸引不少市民前往晨運散步，惟近日被發現有嚴重蚊患，懷疑與園內人工湖積水有關。區議員與立法會議員均要求康文署做好防蚊工作，避免登革熱等疾病傳播。
大群蚊蟲於公園內「龍捲風式」盤旋（紅圈示），嚇煞遊人。
園內人工湖水質污濁，更有大量枯葉等垃圾。
市民點睇
郭先生：「平時朝早跑步都有蚊飛嚟飛去，都好大影響，政府應該要做番啲措施驅蚊啦！」
黃先生：「（政府）要做好防蚊，大人冇所謂，咬親細路仔就唔好，公園係畀大人細路玩得開心。」
居於荃灣的陳先生不時與家人到城門谷公園晨運散步，近日更有不快經驗，「我哋成日都嚟散步，點知嗰日個女喊晒咁跑嚟同我講，話湖邊好多蚊『嬲』住佢，有幾隻仲飛咗入口！依家天氣都未熱已經咁多蚊，遲啲夏天點算？真係唔敢再去！」陳懷疑蚊患與園內人工湖湖水變死水有關，要求部門加強清潔，「啲水又污糟又多垃圾，唔惹蚊就假喇！」
倡樹身加防蚊貼
記者曾實地了解，甫進入公園範圍已見有蚊群儼如龍捲風般在空中盤旋，湖邊的蚊群更撲面而至，園內樹木卻未見有防蚊貼。另外，園內的人工湖噴霧系統未有操作，湖水混濁且有枯葉等垃圾。
「呢排天氣乍暖還寒，但都開始聽到有街坊講公園入面啲蚊多得好犀利，仲好似龍捲風咁飛，康文署應該反應快啲，加強番啲滅蚊措施，好似喺樹身貼啲防蚊貼，唔係一到雨季蚊患就更加失控！」荃灣區區議員黃家華承認近日亦接獲相關投訴，要求康文署正視情況，又指現時誘蚊產卵指數只監察白紋伊蚊，建議當局將其他會引致皮膚痕腫的蚊蟲同納入監察範圍，進一步杜絕蚊患。
康文署指，過去半年共安排承辦商在城門谷公園進行八次滅蚊工作，為加強控制蚊患，去年於上址加置兩部滅蚊機，但承認現時公園內未有種植驅蚊植物。至於人工湖被指變成一潭死水的問題，發言人則稱，會定期清洗園內人工湖，而人工湖內噴霧系統純粹用以增加觀賞性，但近日亦已為系統進行改善工程。
立法會議員麥美娟認為，政府曾對登革熱可能成為香港風土病表示憂慮，建議康文署應吸取經驗，做好防蚊工作，並諮詢專家意見，防患於未然，「唔單止為咗市民健康着想，如果市民因為怕咗公園多蚊蟲而唔去用啲公園，其實到頭來就變咗浪費資源！」
熱線3600 9988
電郵 socserv@on.cc
傳真3600 9900
WhatsApp/SMS 6500 6500
來函請寄：香港大埔工業邨大昌街23號東方報業中心東方報業集團投訴組收
個人資料絕對保密
匿名投訴恕不處理
逢星期一至五見刊
