驚蟄齊齊打小人 禍港妖孽冇碇抖

嗱，今日係一年一度嘅驚蟄，根據中國人嘅傳統，到咗呢個時節，天氣回暖，上天會以打雷驚醒蟄伏土中嘅動物，當然喇，各路魑魅魍魎亦會乘機復出害人，所以咪有打小人嘅習俗囉。講起都幾好笑，近年反對派政客已經取代二奶、情敵同債主，成為最熱門嘅打小人對象，證明佢哋係幾咁不得人心。

唔係誇張o架，有打小人嘅檔主話唔少客人點名要打佔中三子，工黨立法會議員李卓人等反對派政客亦榜上有名，有人甚至一次過花幾百元，左右開弓幾個一齊打添。

咁又係呀，今時今日香港小人當道，無良政客為反對而反對，為爭拗而爭拗，搞到七國咁亂，烏煙瘴氣，特別係佔領之亂，更加令香港雞毛鴨血，幾乎萬劫不復咁滯。正所謂，始作俑者，其無後乎，呢啲小人唔打點得呢？好似人稱AV仁嘅白鴿黨立法會議員何俊仁咁吖，尋日有反黑金團體到佢位於屯門嘅議員辦事處踩場，聲討佢涉嫌漏報物業、議事堂上睇艷照、浪費公帑等多宗罪，促請當局盡快將AV仁落鑊。話時話，廉署調查淫賤黎黑金醜聞已經大半年，究竟查成點？幾時至有結果？唔通又想不了了之？

話香港小人當道，唔係亂噏o架。大家睇吓打小人勝地嘅灣仔鵝頸橋近年愈來愈熱鬧，檔主做到冇停手，幾年前甚至有團體申請列入健力士世界紀錄添，睇嚟今年鵝頸橋又會係人山人海嘅喇。

咪以為打小人純屬迷信吖，正如有心理學家話齋，打小人可以宣洩內心憤怒、怨恨同仇視等消極情緒，起碼唔會動刀動槍郁手郁腳吖嘛。

大家應該仲記得，年前有人發起全城打小人行動，重點招呼對象之一係孤寒成性嘅鬍鬚曾，結果港府真係跪低，向市民派六千蚊。又好似貪曾咁吖，更加係人人喊打，有人甚至創作打小人口訣，「打你個小人爛煲呔，打到你落台畀人拉，接受審訊有排捱」，貪曾貪腐醜聞纏身，分分鐘一語成讖，有排捱o架。

所以話，傳統習俗唔係冇根據，有時真係好靈，寧可信其有，不可信其無。講多無謂，行動最實際，今日一齊用鞋投票，將禍港殃民嘅妖孽掃入垃圾堆啦，叮！