城中鏡：趙樓神三團圓慶元宵
財金人點樣過元宵？長實執行董事「趙樓神」趙國雄話會成家人一齊食鹹湯圓，係佢鄉下常州正月十五嘅傳統。鹹湯圓？佢話鹹湯圓用碎肉做餡，上湯會加啲菜陪襯。仲有，佢家鄉嘅鹹湯圓仲大粒過乒乓波，佢食兩粒就飽。正月十五，人月加埋乒乓鹹湯圓三團圓，相當有意思。
趙國雄話成家人一齊食大過乒乓波嘅鹹湯圓，係佢鄉下常州正月十五嘅傳統。
尋日亦係長和系旗下泓富業績會，泓富每基金分派按年多咗百分之九，趙樓神話自己嘅私人投資上年都冇百分之九增長咁多。佢有乜私人投資？佢話主要喺一啲風險資本，由佢同夥伴操盤，主要投放喺啲初成立科技公司，有十三至十四間內地公司，每間投放咗五十至一百萬元，有啲搞下一代自拍神棍，有啲搞新一代航拍機，但係就要遲下先至有得賣。
李焜明夫婦提早慶祝
BWC寶華世紀資本市場研究及市場企劃傳訊部執行副總裁Joseph李焜明已提早一日同太太慶祝，兩口子前晚喺中環Cafe Landmark燭光晚餐，尋晚就喺屋企晚飯，仲有太太嘅愛心靚湯。
申銀萬國研究（香港）研究部主管Ellie陳鳳珠就無意中睇日曆先發現尋日係元宵，佢尋晚同班金融friend食西餐，有男有女，早約咗，唔關元宵事。睇嚟，後生仔心中只有二月十四日。
