城中鏡：方志基投資夠威
香港南京總會早前舉行新春團拜暨恭賀懲教署前署長「單Sir」單日堅榮休，現身同樂嘅各界好友將現場逼得十分熱鬧。仁濟醫院總理鮑誠業同做投資嘅好友Nigel方志基都有到場，Nigel話近期全球威士忌酒價格因內地人搶飲而飛漲近五倍，佢已買咗一個蘇格蘭酒莊，相信呢股炒風將成為今年亮點。
方志基（左）嗅到威士忌炒風，即買蘇格蘭酒莊釀酒應市，鮑誠業盛讚佢有眼光。
彭詢元（左）同單日堅（中）喺任內為釋囚重投社會做唔少工夫。右為單太Carmen。
本月底張心瑜（左）將交棒畀候任會長王建陵。
內地人嘅購買力全球聞名，只要十三億人民興起買乜，價格必定被搶高，呢期輪到威士忌酒成為新寵。投資專家Nigel話，最近內地人流行飲威士忌，無論陳年或新酒，都瞬間被搶購一空，造成酒品極之渴市。佢睇好呢個商機，即刻買個酒莊大量釀酒，但至少要三年後先可應市。
單Sir張心瑜憶結緣
講番新春團拜，仁愛堂前主席兼總會會長Fiona張心瑜一早到場迎賓。已退休兩個幾月嘅單Sir話，佢同Fiona結緣於十幾年前赤柱監獄嘅一場在囚人士畢業禮，當時嘉賓例牌唔准帶隨身物品，被現場氣氛感動淚流嘅Fiona事後同單Sir投訴，點解唔派紙巾畀人去抹眼淚，不打不相識，自此兩人就結為好友。
Fiona就笑稱，單日堅好叻，係人才又點可以退休？所以已委任佢做總會名譽顧問。同為名譽顧問嘅懲教署前署長彭詢元亦在場，佢話近年本港重犯率大幅下降，同各界支持釋囚更生有莫大關係，值得大家瞓身力撐咁話。
